Luk 10 | ASO | STEP | Ne'mine ogo alinge' nene Guvelesi ve'mo evene' sevedi tuu (72) gohi ma do kegese-ngedo aza alinge' a'mida viline' numuno ebe' mukiku' nene gomu' mili nivilizave lo sita' sita' ngimiseline'.

Luke 10

Izesu' Evene' Sevedi Tuu (72) Mono' Gonolo' nGimiseline' Gamazi

1 Ne'mine ogo alinge' nene Guvelesi ve'mo evene' sevedi tuu (72) gohi ma do kegese-ngedo aza alinge' a'mida viline' numuno ebe' mukiku' nene gomu' mili nivilizave lo sita' sita' ngimiseline'. 2 Nongimiselo ti' lo lo-ngidine': Evene' mene gopo ikelizaze. Mingu' nene noso' nite' muki' goloso o molani'za a'mingu' gono dalonive nene ngomosi' minekunge. Nemu' nene lingine mine melehida likevo gonolo' ve ma ngimiselavo vi minamuno dolizilizave line'. 3 Eii, lingine nene sipisipi ize angale ne'minisa minilisave. Sipisipi ize ingine lovo ve'inelite ngibililisa ikevo ingine a'mido' alete mili ngibililiza gavoso'ine nomivo minaa' nani' ne'minisa nene vi minilisave. Ido' lingine vovo'ningu' vi miniliza aleve neve nene sipisipi ize ngibilaa' ani' loposo gulo ne'minisa nene minilisaze. Mo vilo. 4 Nemu' lingine vilizada nene moni go'zaa' hanipausi nene di vami kisi di monaa' go' nesi di vami gizedido' suu' nesi ma di vami ido' akalo' vilizado' nesi nene di ti' militi' igi evenekisi gamazi lamilo. 5 Ido' lingine vi numuno mau' dizi ma nene a'mine numungu' miniliza alevemu' nene lengita hongu lo minaa' monovo minelive li gomu' li-ngidilo. 6 Ido' a'mine numungu' hongu ve ma mineline' nene a'mine hongu lo minaa' monovo minelive lani' ma nene a'mine velo' mino gihile izeleseive. Ido' engita hongu lo minaa' monovo ma minamivo nilizani' nene a'mine hongu lo minaa' monovo nene gohi tine' molo lengita aloseive. 7 Ido' gonou' ve nene meni'ine dalizado' lisihe' o neine' nenako a'mine numungu' nene ha mini noso' nite' ido' noso avoso lingimilizani' nene ni numuno neu' ongoku meu' ongoku li minami a'mine numuno hamokukovo' nene ha minilo. 8 Ido' numuno ebe' mala nivavo ingine di lamine' i-lingidi lengele'mize nimilavo ma nene noso' nite' nani'mine di igi mili-lingidilizahe nene ha nalo. 9 Ido' inite' gizi dave a'mingu' nilizani' nene di lamine' i-ngidi ti' li li-ngimilo: O'moso'mo gizebo o-lengedeli gamene nene mo avito' ogave li li soto' igi li-ngimilo. 10 Ido' ne'mine ilisani'za lingine numuno ebe' mala nivavo gamazitine gilami di lamine' i-lingidamavo ma a'mine numuno ebeli'mi aka ngomo ngomou' nene nivi ti' li lilo: 11 Lengi' monovotine goloso neine' nene gililizave lo numuno ebetinguti' u'musupo gizedelo' gi'mize neine' nene gohi lengita tile' ogo do nohulune. Do nohulune'za O'moso'mo gizebo o-ledeline' gamene nene mo avito' o neive lo nolo-lingimune' nene gili minilo. 12 Naza ti' lo nolo-lingimuve: Gamene nabau' nene a'mine aleve O'moso'mo lihime ngemeline' nene evene' goloso gehepeve Sodomi aleve mulumo inite' naba ngemeline' nesi nene ivile' ogosa naba goloso ngemeleseive.

Lu'ine Di Velepe' Izama Alevete Mulumo Gono Dalizangumu' Izesu' Lo-ngimine' Gamazi

(Mataio' 11:20-24)

13 Agae, Kolazini aleve ido' Betesaida aleve lengikumu' nene mulumo nogele-lingiduve. Lengita mulumo inite' goloso alinge' soto' o-lengedeleseive. Lengita ato ato' suno do soto' uvoni' ma nene Tilo alevetingukisi Sidoni alevetingukisi do soto' uvodiniko ingine O'mosomu' gilamani' aleve minikeni'za a'minguti' aleve ingine nene mo lute do velepe' izekune li geti lani gisi hili inite' huko pako ine' nene di ngili minadine. Lingine Tilo alevemukisi Sidoni alevemukisi gilavo gamene nabala O'moso'mo lihime naba' naba ngemeleseive li gilaa' nahe. Ne neiha engi' lihime ngemeline' nene ivile' ivosa O'moso'mo lihime naba' naba goloso lengi' lengemeleseive. 15 Ido' Kahanaumi alevekizo, lengi' gulivetine nene Okulumoku' dizelive li di hozi laa' nahe. Lingine nene O'moso'mo olo' galeseu' lengehuso' o huloloseive.

16 Ido' ne'mine lo izipahala ti' lo lo-ngimine': Ve ma ingine lengi' gamazitine gililizave nene lengi' gamazitine nogilube li gililizani' nene neni' gamazi gililisave. Ido' ve ma ningi gosele' i-lingidi gamazitine gilamilizani' nene neni' ninge gosele' igi gamazi'ne gilamilisave. Ido' ve ma neni' ninge gosele' igi gamazi'ne gilamilizani' nene nimiselive ei' nene ningi gosele' i-di gamazi've gilamilisave.

Evene' Sevedi Tuu (72) Mono' Gonolo' Vani' Ma Nene Tine' Mili Ani' Gamazi

17 Ne'mine lo ngimiselavo a'mine evene' sevedi tuu (72) nene visa gohi tine' mili igi mulu'ningu' lanite' goloso gili ngolize izi'mi igi ti' li lani': Guvetesi ve, gei' guliveka ogo sikalahu' golosomukisi gamazi lune' nene inginesi ha gili di vaa' ave. 18 Ne'mine li likevo Izesu' aza ti' lo lo-ngimine': Lingine ne'mine navo Satani nene gopa'na ne'mino Okulumokuti' velehe' limine' gelavo ningekuve. 19 Gilahe. Naza nene amuzo mo lengemekuvoni' nenako ne'mo nene lingine satato' lisilizanikisi ido' evene' ngibilaa' ani' inite' netesi nene ngeli di goloso i-lingidamilisave. Ee, naza Satani'mi amuzo ato ato' vai' nene ivile' ivosa amuzo mo lengeme nouvoni' ne'mo nene inite' hamolitesi lengi' nene ngeli di goloso i-lingidamilisave. 20 Ne'mine o neine'za sikalahu' goloso nete lengi' gamazitine gili di vaa' nani' nemu' nene gilikevo dizavo longolize izami asi O'moso'mo do ngu' izeliveti gulive'ine gizingu' lengi' gulivetinesi Okulumokuko gize neine' nemukovo' nene gilikevo dizavo longolize izi minilo.

Izesu' Olize Izine' Gamazi

(Mataio' 11:25-27; 13:16-17)

21 Ido' Izesu' ne'mine lo nolo-ngidivo mo a'mido' O'moso'mi Sikalahuli'mo do ote-davo olize noizo ti' lo line': Me'neho ve, gaza Okulumo' misubo gizebo o mino Guvekasi ve minanivelike, naza lo soto' ogo noluvoni' gamazi mene evenelite gilikevo evene' ma gili nge li gamazi monovo gilaa' ave minani' nete a'mine'mi monovo nene ningi gilikelizave lo gaza do halekosa a'mine monovo nene evene' izipe ngomo ne'mine mini inite' mukiliti monovomu' olihe gilamavemu' do soto' o-ngedaine' nemu' nene isaa' neve nolo-giduve. Ee, Me'neho ve, gaza ne'mine olosa lamine' gelo ne'mine aine' nemu' nene isaa' neve nolo-giduve. 22 Ne'mine lo gohi ti' lo line': Me'neho aza inite' mata' muki' nene a'neu' molave. Ido' O'moso'mi gipele neni' nene O'moso'mi gipele ve li ningi ma gilamave. Me'neho ei' ne'movo' nene ningo gele neive. Ido' me'nehinemukisi nene zaho nehe ma ningi gilamavo gipele nenikovo' nene ningo gele nouvonako ezemu' nene evene' masi gililizave lo eze monovo lo soto' o ngemeloni' alevesi lelikovo' nene me'nehinemu' ningo gele minelesune. 23 Ido' mine velepe' izo izipahala zuho vonu' nongebelo engikumukovo' ti' lo lo-ngimine': Naza lamineto' ma lo-lengemelove. Gomu' polohete minani' netesi ido' guve'inesi ve linge ma netesi ingine neni' ogo molo nouvoni' inite' idise lingine niningani' memu' nene ningelobo li gilani'za ma ningamani' ve. Ido' laa' nouvoni' gamazi idise lingine gatinedunu' nigilani' nene gelelobo li minaa' ani'za gilamani' ve. Nemu' nene a'mine ningi gili nizani' inite' nene O'moso'mo inite' gihile nene lengeme neize. Longolize izi minilo.

Zuda Veti Mono' Apize nGemaa' Ive Mali'mo Lute nGemelonivemu' Longo' Ogavo Izesu' Aza Biluva' I-lidaa' Avesi Nene Lute nGemelone Lo Aneza Gamazi Line'

25 Ido' Zuda velite mono' gozopotati' laa' ani' sukulu naba lo monekive mali'mo oto Izesu'ni emengu' nomolo ti' lo line': Tisazo, O'moso'mo minevo' minevo' nemeni dameni nemeline' nene naza nadi' okuvosa nemelive. 26 Ne'mine lo longo' o-davo Izesu' ti' lo lo-imine': Gaza longo' o-nidaine' gamazimu' nene O'moso'mi lou' gamazi neu' nene nadive li gizi nizavo gataa' nane lo longo' o-dine'. 27 Longo' o-davo Gozopo' laa' ani' mono' apize ngemaa' ive aza ti' lo lo-imine': O'moso'mi lou' gamaziu' nene ti' li gizi nizave: Lutine gatine vodinesi amuzotine vai' nesi nene Guvelesi ve O'mosotida nene mili osu' li lutine imivo' minilo. Ido' lingine lengi' okodinemu' gilaa' nani' ne'mine igi evene' avita gidini nizavemukisi nene gilii lutine ngimilo. 28 Ne'mine lavo Izesu' ti' lo lo-imine': Gaza mo lamine' gehepeve laange. Minevo' minevo' oga' gemeni dameni doo mineliningisi gaza laine' ne'mine ozo.

29 Ne'mine lo-davo a'mine ve aza ovozo helo ovozo hiline' aka've hize tilelove lo gelo Izesu'ni ti' lo longo' o-dine': Ido' a'mine O'moso'mi lou' gamazi nene evene' avita gidini nizave lutine ngimilo line' nene zamotine zamotine lute ngemeloningumu' live. 30 Ne'mine lavo Izesu' ti' lo lo-imine': Leli' Zuda veuti' ve ma aza Zelusalemi numuno ebe' hulo Zeliko numuno ebeta lemo novivo lasikoli nete akalo' novido' ningi inite' mata've ipe' igi di bili huli akalo' iki vikevo helaato' minine'. 31 Ne'mino ongo neivo eze mulumolo ningo do lamine' o-delido' o minive gehepeve leli' Zuda veuti' evene' gohi ma eveneto' medelo mino O'moso inite' lehize-daa' ive nene a'mine akalo' nene lemo viline' ogavo lemo novo a'mine bili hulikave nene ningo ninge hulo-do aka do zovo' izo vine'. 32 Vavo a'mine'mine ogo mono' numuno nabau' gono daa' ive Levi' a'vopilemokuti' ve ma nene a'mida lemo ogo a'mine bili hulikave nene ningo aka do zovo' izo vine'. 33 Vavo Zuda ve leli' biluva' Samalia ve ma nene Zuda ve sita' vasidi'mine ogo vo bili hulikave nene ningo muluno goloso hukavo 34 neida vo bilado' nene holo-ngedaa' inite' uvelisi vaini nososi nene holo-do banisi like-do ele'mizo do hozi lo dongi ize'velo' nene molo-do maka' ele'mizo do vo venenga ve meni hizi ingaa' ani' numungu' nene do lamine' o-dine'. 35 Ne'mine igi ingi go' lavo Samalia ve aza mo volosa a'mine venenga ve ingaa' ani' numudo' gizebo ve nene moni tu kina (K2) ma noemo ti' lo lo-dine': Gaza ve mene gizebo lamine' o-dezo. Ne'mine o-do nanivo moni nene osu' lavo ei' oko'nolo' inite' nanite' haza o-delibe naza tine' molo alodo' nene ogo bekimi ogo meni gemelesuve. 36 Ne'mine lo line' nemu' nene gaza nadive lo gele nane. Evene' setihami ani' neuti' nene akalo' bili hulikave ne'mi evenele avita gidini minive nene zaho minive. 37 Ne'mine lavo gozopotati' laa' ani' mono' apize ngemaa' ive aza ti' lo lo-imine': Muluno goloso hukive neve ne neive. Lavo Izesu' ti' lo lo-imine': Gaza vo ei' ine' ne'mine ogo minelesane.

Izesu' Aza Mataki Maliaki Numu'ningu' Vo Neivo Malia' Aza Gamazi've Gelo Minine' Nemu' Lamine' Ve Line' Gamazi

38 Ne'mine lo neloti' akalo' gohi vi numuno ebe' ngomo ma miningu' vi hetelani'. Vi hetelikevo a'mine numudo' nene vene' ma minine' gulive Mata' aza Izesu'ni nene ei' numu'veu' ele'mize molani'. 39 A'mingu' nene Mata' alunolo ma minine' gulive Malia' aza nene ogo Guvelesi ve'mi gizenela mino gamazi've gelo minine'. 40 Ne'mino neivo Mata' aza noso' nitekisi inite' vaikisi do lisihe' ogo mino gono mene mo nivizeline' ogave lo gelo Izesuda vo ti' lo lo-imine': Guvekasi ve, alu'ne nene ninge lede-nimikivo gono naba mene nenikovo' do nouvoni' nemu' nene ma gelamabe. Gaza lo-danivo ogo hize ele' o-nidivo makato' gono dalosive. 41 Ne'mine lavo Guvelesi ve'mo ti' lo lo-imine': Eii, Matazo, gaza nene inite' mukikumu' gaka muki' gelo mulungau' nene goloso nogelaine'za 42 inite' hamokumukovo' gelelone' o neine' nenako Malia' nene a'mine inite' lamine' nene dalosa gelave. Nemu' nene laza daline' aka nene ma hize tile-damolosusive lo line'.